
பெங்களூரு, நவ. 20- கர்நாடக அரசுப் பணியாளர் தேர்வாணையம் (கே.பி.எஸ்.சி.) நடத்திய கால்நடை மருத்துவ அதிகாரி தேர்வு முறைகேடு வழக்கில், ஐ.ஏ.எஸ். அதிகாரி கங்க்வார் மற்றும் இடைத்தரகர் பசவராஜ் கன்னாளை ஆகியோர் மீது சிறப்பு புலனாய்வுக் குழு (எஸ்.ஐ.டி.) ஓரிரு நாட்களில் கோர்ட்டில் குற்றப்பத்திரிகை தாக்கல் செய்ய உள்ளது. ஐகோர்ட்டு உத்தரவுப்படி இந்த வழக்கை விசாரித்து வரும் சிறப்பு புலனாய்வுக் குழு, தேர்வர்களுக்கு வினாத்தாள் மற்றும் விடைக் குறிப்புகளை (ஆன்சர் கீ) கசியவிட்டதற்கான முக்கிய ஆதாரங்களைச் சேகரித்துள்ளது.
வழக்கின் ஆரம்பக்கட்ட விசாரணையை நடத்திய சி.ஐ.டி. போலீசார், முக்கிய குற்றவாளியான கங்க்வாரை கடந்த ஆகஸ்ட் 29-ஆம் தேதி பெங்களூருவில் கைது செய்தனர். அடுத்த நாளே டெல்லியில் பசவராஜ் கன்னாளை பிடித்தனர். வருகிற 26-ஆம் தேதியுடன் கங்க்வார் கைதாகி 90 நாட்கள் முடிவடைகின்றன. இப்போது மூத்த ஐ.பி.எஸ். அதிகாரியும், ஏ.டி.ஜி.பி.யுமான ஆர். ஹிதேந்திரா தலைமையில் சிறப்பு புலனாய்வுக் குழு விசாரணை தீவிரமாக நடந்து வருகிறது.
கங்க்வார் மற்றும் கன்னாளை ஆகியோர் பல தேர்வர்களுக்கு விடைக் குறிப்புகளைக் கொடுத்ததும், சிலருக்கு வினாத்தாள் மற்றும் விடை என இரண்டையும் கொடுத்ததும் விசாரணையில் தெரியவந்துள்ளது. விடைக் குறிப்பு வாங்கிய தேர்வர்களில் 6 பேரின் ஓ.எம்.ஆர். விடைத்தாள்களை ஆய்வு செய்தபோது அதிகாரிகளுக்கே அதிர்ச்சி காத்திருந்தது. அந்த 6 பேரும் ஒரே கேள்விகளுக்கு ஒரே மாதிரி சரியான விடை எழுதியிருந்ததுடன், தவறான விடைகளையும் ஒரே மாதிரி எழுதியுள்ளனர். இதை சிறப்பு புலனாய்வுக் குழு தனது அறிக்கையில் பதிவு செய்துள்ளது.
இதற்கிடையே, சஸ்பெண்ட் செய்யப்பட்ட கே.பி.எஸ்.சி. தலைவர் சிவ சங்கரப்பா சாகுகார் சுமார் 20 முதல் 25 தேர்வர்களுக்கு தேர்வு அறையில் இடம் ஒதுக்கி, அவர்களுக்கு சுமார் 80 விடைக் குறிப்புகளைப் பகிர்ந்தது விசாரணையில் அம்பலமாகியுள்ளது. தேர்வர்களுக்கு விடைகளை எழுதிக் கொடுத்த கையெழுத்துச் சீட்டுகளையும் அதிகாரிகள் பறிமுதல் செய்துள்ளனர்.
தேர்வில் பொது அறிவு மற்றும் கால்நடை மருத்துவ அறிவியல் ஆகிய 2 வினாத்தாள்கள் இருந்தன. ஒவ்வொன்றிலும் ஏ, பி, சி, டி என 4 வரிசைகளில் தலா 100 கேள்விகள் இடம்பெற்றிருந்தன. ஆனால், 4 வரிசைகளிலும் கேள்விகளின் வரிசை எண் மாற்றியமைக்கப்பட்டிருந்தது. தங்கள் தேர்வர்களுக்கு எந்த வரிசை வினாத்தாள் கிடைக்கும் என்பதைத் தெரிந்து கொண்ட சாகுகார், அதற்கேற்ப விடைகளை எழுதிக் கொடுத்ததாகக் கூறப்படுகிறது. தேர்வர்கள் விடைகளை 10 எண்கள் கொண்ட தொகுப்புகளாக மனப்பாடம் செய்ய அறிவுறுத்தப்பட்டதாக போலீசார் தெரிவித்தனர்.
மேலும், அதிக மதிப்பெண் எடுத்தால் சந்தேகம் வந்துவிடும் என்பதற்காக, 80-க்கு மேல் விடைகள் கொடுக்க வேண்டாம் என கங்க்வார் உள்ளிட்டோர் கவனமாக இருந்துள்ளனர். வேண்டுமென்றே சில தவறான விடைகளையும் கொடுத்துள்ளனர்.
கங்க்வார், கன்னாளை ஆகியோரின் தேர்வர்கள் குழுவுக்கும், சாகுகார், கீதா ஆகியோரின் தேர்வர்கள் குழுவுக்கும் எந்தத் தொடர்பும் இல்லை என்பதையும் சிறப்பு புலனாய்வுக் குழு கண்டறிந்துள்ளது. கங்க்வார், கன்னாளை தனி பட்டியலையும், சாகுகார், கீதா தனி பட்டியலையும் வைத்து தேர்வர்களைத் தேர்வு செய்துள்ளனர். தேர்வுக்கு ஒரு நாளுக்கு முன்பே 4 பேரும் தங்கள் தேர்வர்களுக்கு விடைக் குறிப்பைக் கொடுத்துள்ளனர். ஆனால், யாருக்கு எந்த வரிசை வினாத்தாள் வரும் என்பது கங்க்வாருக்கு மட்டுமே தெரிந்திருந்தது விசாரணையில் தெரியவந்துள்ளது. முக்கிய ஆதாரங்களைத் திரட்டியுள்ள சிறப்பு புலனாய்வுக் குழு, இப்போது குற்றப்பத்திரிகை தாக்கல் செய்யும் நிலைக்கு வந்துள்ளது.















