சென்னை: செப். 21-
தமிழகத்தில் மதுராந்தகம், தாராபுரம் சட்டசபை தொகுதிகளுக்கான இடைத்தேர்தல் பிரசாரம் சூடுபிடித்துள்ள நிலையில், இளைஞர்களைக் கவர தமிழக வெற்றிக் கழகம் (தவெக) பயன்படுத்திய சமூக வலைதள உத்திகளை பிற கட்சிகளும் பின்பற்றத் தொடங்கியுள்ளன.
2026 சட்டசபைத் தேர்தலுக்கு முன்னதாகவே இன்ஸ்டாகிராம் உள்ளிட்ட சமூக வலைதளங்களில் தீவிர பிரசாரம் மேற்கொண்ட தவெக, தற்போது நடைபெறவுள்ள இடைத்தேர்தல்களிலும் அதே அணுகுமுறையைப் பயன்படுத்தி வருகிறது. இதையடுத்து, பல்வேறு கட்சி வேட்பாளர்கள் தனிப்பட்ட குழுக்கள், உள்ளூர் பகுதிகளுக்கான பிரத்யேகப் பக்கங்கள், சமூக ஊடகப் பிரபலங்கள், தேர்தல் வியூக மையங்கள் என நான்கு வார பிரசாரத்துக்கு தயாராகியுள்ளனர்.
இரு தொகுதிகளிலும் வாக்காளர்களில் மூன்றில் ஒரு பங்குக்கும் அதிகமானோர் இளைஞர்கள் என்பதால், அவர்களைக் கவர கட்சிகள் சமூக ஊடகப் பிரசாரத்தை தீவிரப்படுத்தியுள்ளன. சட்டசபைத் தேர்தலில் சமூக ஊடகப் பிரசாரத்தில் ஏற்பட்ட பின்னடைவு வெற்றியைப் பாதித்ததாக ஒப்புக்கொண்ட திமுக, புதிதாக உருவாக்கப்பட்ட பக்கங்களில் ‘ரீல்ஸ்’ வீடியோக்களை வெளியிட்டு வருகிறது. அவற்றில் திமுக தலைவர் ஸ்டாலின், எதிர்க்கட்சித் தலைவர் உதயநிதி ஆகியோரின் பேச்சுகள் முன்னிலைப்படுத்தப்படுகின்றன. மதுராந்தகம் திமுக வேட்பாளர் ஐ.பரந்தாமன் இன்ஸ்டாகிராமில் 100 பதிவுகளை வெளியிட்டுள்ளார். ரஜினிகாந்தின் ‘ஜெயிலர்’ திரைப்படப் பின்னணி இசையுடன் மெதுவான வேகத்தில் உருவாக்கப்பட்ட வீடியோக்களும் இதில் இடம்பெற்றுள்ளன. அதிமுக வேட்பாளர் கனிதா சம்பத்தின் பிரசாரமும் உள்ளூர் சமூக ஊடகக் கணக்குகள் மூலம் பகிரப்படுகிறது. தவெக வேட்பாளர் மரகதம் குமரவேலை விமர்சிக்கும் வயதான பெண்களின் வீடியோக்களும் பரவி வருகின்றன. மரகதம் குமரவேலின் சில வீடியோக்களை 5 லட்சத்துக்கும் மேற்பட்டோர் பார்த்துள்ளனர்.
