பெங்களூர்: செப். 22-
கர்நாடக மாநிலத்தில் வருமானத்திற்கு அதிகமாக நூற்றுக்கணக்கான மடங்கு சட்டவிரோத சொத்து சேர்த்தல் மற்றும் ஊழல் குற்றச்சாட்டுகளின் பின்னணியில், மாநிலத்தின் பல இடங்களில் ஒரே நேரத்தில் சோதனை நடத்திய லஞ்ச ஒழிப்புத் துறை (லோகாயுக்தா) அதிகாரிகள், 8 ஊழல் அதிகாரிகளைத் தங்கள் வலையில் வீழ்த்தி, கோடிக்கணக்கான ரூபாய் மதிப்பிலான சட்டவிரோத சொத்துக்களைக் கண்டுபிடித்துள்ளனர்.
வலையில் சிக்கிய 8 ஊழல் அரசு அதிகாரிகளின் அலுவலகங்கள், வீடுகள் மற்றும் உறவினர்களின் வீடுகளில் இன்று அதிகாலை முதலே எஸ்பிக்கள் தலைமையில் ஒரே நேரத்தில் சோதனை நடத்தப்பட்டது. இதில் பெருமளவிலான ரொக்கப் பணம், தங்க நகைகள், ஆடம்பரப் பொருட்கள், வெளிநாட்டு மதுபானங்கள் உள்ளிட்ட சொத்துக்களின் ஆவணங்களை அதிகாரிகள் பறிமுதல் செய்து தீவிர பரிசீலனை மேற்கொண்டு வருகின்றனர்.
பெங்களூரு, பீதர், மண்டியா, சிக்கபள்ளாபூர், குடகு ஆகிய மாவட்டங்களில் சோதனை நடத்தப்பட்டுள்ள 8 ஊழல் அதிகாரிகளின் அலுவலகங்கள் மற்றும் வீடுகளில் சோதனையானது தொடர்ந்து நடைபெற்று வருகிறது. மாலை வேளையில் இச்சோதனையில் சிக்கிய ரொக்கப் பணம், தங்க நகைகள், ஆடம்பரப் பொருட்கள் மற்றும் சொத்து ஆவணங்களின் மொத்த மதிப்பு பற்றிய விவரங்கள் தெரியவரும்.
பல்வேறு இடங்களில் லஞ்ச ஒழிப்புத் துறை அதிகாரிகள் குழுவினர் ஆவணங்கள், சொத்து விவரங்கள் மற்றும் பிற தொடர்புடைய ஆவணங்களைச் சரிபார்த்து ஆய்வு செய்து வருவதாக லஞ்ச ஒழிப்புத் துறையின் மூத்த அதிகாரிகள் தெரிவித்துள்ளனர்.
வேளாண்மைத் துறையின் ஓய்வுபெற்ற நிர்வாக அதிகாரி மாணிக் ஷெரிகார் என்பவரின் பீதர் நகரத்தில் உள்ள ஹள்ளி காலனி இல்லம், ஹும்னாபாத்தில் உள்ள இல்லம் மற்றும் சிட்குப்பா தாலுகாவில் உள்ள முத்தங்கி கிராமத்திற்கு அருகில் உள்ள பண்ணை வீடு ஆகிய இடங்களில் லஞ்ச ஒழிப்புத் துறை டிஎஸ்பி ஹனுமந்த ரெட்டி தலைமையிலான குழுவினர் சோதனை நடத்தினர்.
மூன்று இடங்களில் சோதனை நடத்தியுள்ள லஞ்ச ஒழிப்புத் துறை அதிகாரிகள் குழுவினர் தீவிர சோதனை நடத்தி, முக்கிய ஆவணங்களைத் தேடி வருகின்றனர்.
கல்புர்கியிலும் அதிரடி சோதனை
ஜெஸ்காம் உதவி செயற் பொறியாளர் ராஜேஸ்வரி என்பவரின் இரண்டு வீடுகள் மற்றும் அலுவலகத்தில் இன்று காலை ஒரே நேரத்தில் லஞ்ச ஒழிப்புத் துறை சோதனை நடைபெற்றது.
கல்புர்கி நகரின் மகாலட்சுமி லேஅவுட்டில் உள்ள வீடு, காத்ரி செக் பகுதியில் உள்ள மற்றொரு வீடு மற்றும் கல்புர்கியில் உள்ள அவரது ஜெஸ்காம் அலுவலகம் ஆகியவற்றிலும் லஞ்ச ஒழிப்புத் துறை அதிகாரிகள் சோதனை நடத்தியுள்ளனர்.
வருமானத்திற்கு அதிகமாக சொத்து சேர்த்த குற்றச்சாட்டின்கீழ் லஞ்ச ஒழிப்புத் துறை அதிகாரிகள் இச்சோதனையை நடத்தியுள்ளனர்.
காலையில் நடைப்பயிற்சி (Walking) சென்ற அதிகாரி வீட்டிற்குத் திரும்புவதற்குள், லஞ்ச ஒழிப்புத் துறை அதிகாரிகள் சோதனை நடத்தி அவருக்கு அதிர்ச்சி அளித்தனர்.
வலையில் சிக்கிய அதிகாரிகள்:
- தர்ஷன் கௌடா – முதல் நிலை உதவியாளர், மாவட்ட ஆட்சியர் அலுவலகம், சிக்கபள்ளாபூர்.
- ரங்கநாத் எச்.எம் ஓய்வுபெற்ற உதவி செயற் பொறியாளர் பிபிஎம்பி, பெங்களூரு.
- ஸ்ரீதேவி – மாவட்டப் பதிவாளர், பெங்களூரு.
*. ரமேஷ் – நகராட்சி ஆணையர், நகரசபை, மடிக்கேரி. - கிரண் குமார் பைந்தூர் – உதவி செயற் பொறியாளர் ஹெஸ்காம் , ஹூப்ளி-தார்வாட்.
- ராஜேஸ்வரி – உதவி செயற் பொறியாளர் ஜெஸ்காம் கல்புர்கி.
- மாணிக் ராவ் – உதவி இயக்குநர், வேளாண்மைத் துறை, பீதர்.
- சிவராஜு – விடுதி கண்காணிப்பாளர், பிற்படுத்தப்பட்டோர் நலத்துறை, மண்டியா.
