பெங்களூரு, அக். 12-
காங்கிரஸ் கட்சியின் மக்களவை எம்.பி. அங்கோம்சா பிமோல் அகோய்ஜமை உடனடியாக கைது செய்யக் கோரியும், அவரை நாடாளுமன்றத்தில் இருந்து சஸ்பெண்ட் செய்யக் கோரியும் பெங்களூரில் பாரதிய ஜனதா கட்சியின் மகளிர் அணியினர் (மகிளா மோர்ச்சா) தீவிர போராட்டத்தில் ஈடுபட்டனர்.
ஜவஹர்லால் நேரு பல்கலைக்கழகத்தில் பணியாற்றி வந்த பேராசிரியரான இவர் மீது, மாணவிகள் அளித்த பாலியல் தொல்லை புகார்கள் குறித்து உள்விசாரணை நடத்தப்பட்டது. அந்த விசாரணையைத் தொடர்ந்து, அவரது சேவையை பல்கலைக்கழக நிர்வாகம் ரத்து செய்து அவரை பணிநீக்கம் செய்தது. இந்த சம்பவத்தை அடுத்து போராட்டம் தீவிரமடைந்தது.
போராட்டத்தில் ஈடுபட்ட மகளிர் அணியினர், கர்நாடக காங்கிரஸ் அலுவலகத்தை நோக்கி பேரணியாகச் செல்ல முயன்றனர். ஆனால், மாநகராட்சி விதிகளின்படி ஃப்ரீடம் பார்க்கில்மட்டுமே போராட்டங்கள் நடத்த அனுமதி உண்டு எனக் கூறி, பேரணியாகச் செல்ல முயன்ற பல போராட்டக்காரர்களை காவல் துறையினர் கைது செய்து தடுப்புக் காவலில் வைத்தனர்.
பெண்கள் பாதுகாப்பு தொடர்பான இந்த தீவிர குற்றச்சாட்டுகள் குறித்து காங்கிரஸ் தலைமை மௌனம் காப்பதாகவும், அதேவேளையில் இந்திய தேர்தல் ஆணையம் தொடர்பான நீதிமன்றத்தின் பரிசீலனையில் உள்ள விவகாரங்களை எழுப்பி மக்களின் கவனத்தைத் திருப்ப முயல்வதாகவும் பா.ஜ.க தலைவர்களும் போராட்டக்காரர்களும் குற்றம் சாட்டினர்.
அந்த எம்.பி.க்கு எதிராக ஏற்கனவே முதற்கட்ட தகவல் அறிக்கை பதிவு செய்யப்பட்டுள்ளது. அதில் பாலியல் அத்துமீறல்கள், அருவருக்கத்தக்க பேச்சுகள் மற்றும் தகாத நடத்தைகளில் ஈடுபட்டதாகக் கடுமையான குற்றச்சாட்டுகள் சுமத்தப்பட்டுள்ளன.
இருப்பினும், தன் மீதான அனைத்துக் குற்றச்சாட்டுகளையும் அந்த எம்.பி. திட்டவட்டமாக மறுத்துள்ளார். இந்தக் குற்றச்சாட்டுகள் முற்றிலும் ஆதாரமற்றவை, அரசியல் உள்நோக்கம் கொண்டவை மற்றும் தம்மை இலக்கு வைத்து நடத்தப்படும் பழிவாங்கும் நடவடிக்கை என்றும் அவர் தெரிவித்துள்ளார்.
