புதுடெல்லி, அக்.12- வாக்காளர் பட்டியலின் சிறப்பு தீவிர திருத்த (எஸ்.ஐ.ஆர்.) நடவடிக்கையை எதிர்த்து, மக்களவை எதிர்க்கட்சித் தலைவர் ராகுல் காந்தி மற்றும் ‘இந்தியா’ கூட்டணியின் தலைவர்கள் உச்ச நீதிமன்றத்தை நோக்கி பேரணி நடத்தினர்.
அதேவேளையில், வாக்காளர்களின் பெயர்கள் பெருமளவில் நீக்கப்பட்டுள்ளதாகவும், வாக்காளர் பட்டியல் திருத்தத்தில் முறைகேடுகள் நடந்துள்ளதாகவும் குற்றம்சாட்டி, காங்கிரஸின் சட்டப் பிரிவு சார்பில் உச்ச நீதிமன்றத்தில் மனு தாக்கல் செய்யப்பட்டுள்ளது.
தேர்தல் ஆணையத்தின் எஸ்.ஐ.ஆர். நடவடிக்கையை எதிர்த்து ராகுல் காந்தியும் உச்ச நீதிமன்றத்தில் ரிட் மனு தாக்கல் செய்துள்ளார். இந்த நடவடிக்கையை உடனடியாக நிறுத்த வேண்டும் என்றும், தலைமைத் தேர்தல் ஆணையர் ஞானேஷ் குமாரை பதவியில் இருந்து நீக்க வேண்டும் என்றும் எதிர்க்கட்சிகள் வலியுறுத்தியுள்ளன.
‘வாக்கு திருட்டு’ குற்றச்சாட்டுக்கு எதிராக போராட்டம்
‘ஜனநாயகத்துக்கான பேரணி’ என்ற பெயரில் நடத்தப்பட்ட இந்தப் போராட்டத்திற்கு மக்களவை எதிர்க்கட்சித் தலைவர் ராகுல் காந்தி மற்றும் அகில இந்திய காங்கிரஸ் தலைவர் மல்லிகார்ஜுன கார்கே தலைமை தாங்கினர்.
சமாஜ்வாடி கட்சித் தலைவர் அகிலேஷ் யாதவ், இந்திய கம்யூனிஸ்ட் தலைவர் டி. ராஜா, மார்க்சிஸ்ட் கம்யூனிஸ்ட் தலைவர் எம்.ஏ. பேபி, ஆர்.ஜே.டி. தலைவர் தேஜஸ்வி யாதவ், என்.சி.பி. (எஸ்.சி.பி.) தலைவி சுப்ரியா சுலே, சிவசேனா (யு.பி.டி.) தலைவர் சஞ்சய் ராவத், சி.பி.ஐ.(எம்.எல்.) தலைவர் தீபங்கர் பட்டாச்சார்யா மற்றும் ஐ.யு.எம்.எல். தலைவர் இ.டி. முகமது பஷீர் உள்ளிட்ட பல தலைவர்கள் இந்தப் பேரணியில் பங்கேற்றனர்.
காங்கிரஸ் எம்பி பிரியங்கா காந்தி வத்ரா, சசி தரூர், சச்சின் பைலட், முகுல் வாஸ்னிக் மற்றும் திரிணாமுல் காங்கிரஸின் சாகரிகா கோஷ் ஆகியோரும் போராட்டத்தில் கலந்துகொண்டனர்.
சமூக ஆர்வலர்கள் யோகேந்திர யாதவ், நந்திதா நாராயண் மற்றும் அகில இந்திய மாணவர்கள் சங்க (ஏ.ஐ.எஸ்.ஏ.) தலைவி நேகா போரா உள்ளிட்ட நூற்றுக்கணக்கான தொண்டர்கள் பேரணியில் கலந்துகொண்டனர்.
தடுப்புகளை அமைத்து பேரணியை தடுத்த போலீசார்
போராட்டக்காரர்கள் முதலில் டெல்லியில் உள்ள கான்ஸ்டிடியூஷன் கிளப்பில் கூடினர். பின்னர், நான்கு ஏசி பேருந்துகளில் பாராகம்பா சாலை சந்திப்பு வரை சென்று, அங்கிருந்து உச்ச நீதிமன்றத்தை நோக்கி பேரணியாகச் சென்றனர்.
ஆனால், போராட்டத்தைத் தடுப்பதற்காக விதிக்கப்பட்டிருந்த தடைகளுக்கு இடையே சென்று கொண்டிருந்த பேரணியை, பகவான் தாஸ் சாலையில் போலீசார் தடுப்புகளை அமைத்துத் தடுத்தனர். அப்போது ராகுல் காந்தி மற்றும் சமாஜ்வாடி கட்சித் தலைவர் அகிலேஷ் யாதவ் உள்ளிட்ட சிலர் வாகனத்தின் மீது ஏறி தலைமைத் தேர்தல் ஆணையருக்கு எதிராகக் கடும் கண்டனம் தெரிவித்தனர்.
