பெங்களூரு, அக். 13-
பெங்களூரு வட தாலுகா ஹெசரகட்டா ஏரியில் கல்லூரியில் விநாயகர் பிரதிஷ்டை செய்திருப்பதாகக் கூறிவிட்டுச் சென்ற மாணவன், ஏரியில் குளிக்கச் சென்றபோது நீரில் மூழ்கி பரிதாபமாக உயிரிழந்தார். காமாக்ஷிபாளையா பகுதியைச் சேர்ந்த விஸ்வநாத் மற்றும் பவ்யா தம்பதியின் 20 வயது மகன் ஹர்ஷ் என்பவரே உயிரிழந்த மாணவராவார். நேற்று வீட்டிலிருந்த கடவுள் பூஜையை முடித்த ஹர்ஷ், தங்கள் கல்லூரியில் விநாயகரை பிரதிஷ்டை செய்திருப்பதாகத் தாயிடம் கூறிவிட்டு வீட்டிலிருந்து கிளம்பியுள்ளார். ஆனால், நேராகக் கல்லூரிக்குச் செல்வதற்குப் பதிலாக அவர் தனது நண்பர்களுடன் ஹெசரகட்டா ஏரிக்குச் சென்றுள்ளார். அங்கு ஏரியில் நீந்துவதற்காகத் தண்ணீரில் இறங்கியபோது, நீச்சல் சரியாகத் தெரியாத காரணத்தினால் ஆழமான பகுதிக்குச் சென்று நீரில் மூழ்கி அவர் உயிரிழந்தார்.
மாணவன் நீரில் மூழ்கிவிட்டதாகத் தகவல் கிடைத்ததும் சோலதேவனஹள்ளி காவல் நிலையப் போலீசாரும் தீயணைப்புப் படை வீரர்களும் உடனடியாகச் சம்பவ இடத்திற்கு விரைந்து வந்து தேடுதல் பணியைத் தொடங்கினர். பின்னர், மூழ்கல் நிபுணர் ஈஸ்வர் மல்பே என்பவரின் உதவியுடன் ஏரியில் தீவிரமாகத் தேடப்பட்டு ஹர்ஷின் சடலம் வெளியே எடுக்கப்பட்டது. இந்தச் சடலம் பிரேத பரிசோதனைக்காக விக்டோரியா மருத்துவமனை சவக்கிடங்குக்கு அனுப்பி வைக்கப்பட்டுள்ளது. இது தொடர்பாகச் சோலதேவனஹள்ளி காவல் நிலையத்தில் வழக்குப்பதிவு செய்யப்பட்டுள்ள நிலையில், போலீசார் தொடர்ந்து விசாரணை நடத்தி வருகின்றனர். தன் அன்பு மகனைப் பறிகொடுத்துவிட்டுத் தவிக்கும் பெற்றோரின் கதறல் விண்ணைப் பிளந்துள்ளதுடன், அப்பகுதி முழுவதிலும் கடும் சோகச் சூழல் ஏற்பட்டுள்ளது.
