குல்காம்: நவ. 15-
ஜம்மு-காஷ்மீரின் குல்காம் பகுதியில் 46-வது பட்டாலியனைச் சேர்ந்த மத்திய ரிசர்வ் போலீஸ் படை (சிஆர்பிஎப்) சோதனைச் சாவடி அமைந்துள்ளது. இந்தச் சோதனைச் சாவடி மீது கடந்த நவம்பர் 11-ஆம் தேதி தீவிரவாதிகள் துப்பாக்கிச் சூடு நடத்தினர். இந்தத் தாக்குதலில் 3 சிஆர்பிஎப் வீரர்கள் காயமடைந்தனர். அவர்கள் தொடர்ந்து தீவிர சிகிச்சை பெற்று வருகின்றனர்.
இந்தத் தாக்குதல் சம்பவம் தொடர்பாக பாதுகாப்பு முகாம் அதிகாரிகள் தீவிர விசாரணை நடத்தி வருகின்றனர். குறிப்பாக, உள்ளூரைச் சேர்ந்த அப்துல் லத்தீப் மற்றும் மேலும் 2 பாகிஸ்தான் தீவிரவாதிகள் தலைமையிலான லஷ்கர்-இ-தொய்பா அமைப்பை மையமாகக் கொண்டு விசாரணை முன்னெடுக்கப்படுகிறது.
இந்தத் தாக்குதல் தற்செயலாக நடத்தப்பட்டதாகத் தெரியவில்லை என்று புலனாய்வாளர்கள் நம்புகின்றனர். துப்பாக்கிச் சூடு நடத்துவதற்கு முன்பாக தீவிரவாதிகள் அப்பகுதியை வேவு பார்த்திருக்கலாம் என விசாரணையில் கருதப்படுகிறது. மேலும், தாக்குதலில் ஈடுபட்ட தீவிரவாதிகளுக்கு உள்ளூரில் வசிப்பவர்கள் தங்குமிடம் வழங்கியதுடன், அவர்கள் அங்கிருந்து தப்பிச் செல்லவும் உதவியதாகத் தகவல் வெளியாகியுள்ளது.
இதையடுத்து, தீவிரவாதிகளுக்கு உள்ளூரில் கிடைத்ததாகக் கூறப்படும் ஆதரவு வலையமைப்பைக் கண்டறியும் நோக்கில் பாதுகாப்புப் படையினர் விசாரணையைத் தீவிரப்படுத்தியுள்ளனர். கடந்த 2 நாட்களில் 500-க்கும் மேற்பட்டோரிடம் விசாரணை நடத்தப்பட்டுள்ளது. விசாரணைக்கு அழைக்கப்பட்டவர்களில் பெரும்பாலானோர் பின்னர் விடுவிக்கப்பட்டனர். எனினும், மேலும் தீவிர விசாரணை நடத்துவதற்காக 20 பேர் தடுத்து வைக்கப்பட்டுள்ளனர். தாக்குதலுக்குப் பின்னால் செயல்பட்டதாகக் கூறப்படும் உள்ளூர் உதவி வலையமைப்பு குறித்து அவர்களிடம் தொடர்ந்து விசாரணை நடைபெற்று வருகிறது.
