திமுக கூட்டணியில் தொடர இடதுசாரிகள் சிந்தனை

சென்னை, அக். 29-
இடதுசாரி கட்சிகளிலும் திமுகவுடன் இணைந்து செல்வதில் பெரிய பிரச்சினை இல்லை என்ற மனநிலை நிலவுவதாகவும், மு. வீரபாண்டியன் உள்ளிட்டோர் திமுக கூட்டணியில் தொடர்வது குறித்து சிந்தித்து வருவதாகவும் மூத்த அரசியல் விமர்சகர் ரவீந்திரன் துரைசாமி தெரிவித்துள்ளார்.
தமிழ் நிறம் சேனலுக்கு அளித்த பேட்டியில் அவர் கூறியதாவது: காங்கிரஸில் உள்ள 9 எம்.பி.க்களில் சுமார் 6 பேர் திமுகவுடன் இணக்கமாக உள்ளனர். ஜோதிமணி, செல்வப்பெருந்தகை உள்ளிட்டோர் இதை வெளிப்படையாகப் பேசுகின்றனர்.
திமுகவுடன் கூட்டணி அமைத்தது தவறு என காங்கிரஸில் சிலர் கருதுகின்றனர். பிரியங்கா காந்தி தரப்பிலிருந்தும் திமுக எம்.பி.க்களிடம் இதுபோன்ற பேச்சுகள் சென்றிருப்பதாகத் தெரிகிறது. ஸ்டாலினால் கூட்டணி கட்சிகளின் வாக்குகளைப் பெற உதவ முடியும். அந்த வாக்குகளால்தான் கூட்டணி கட்சிகள் வெற்றி பெற முடிகிறது.
2004, 2009, 2019, 2024 மக்களவைத் தேர்தல்களில் ஸ்டாலின் கூட்டணி கட்சிகளின் வெற்றிக்கு உதவியுள்ளார். 2024-ல் திமுக ஆதரவால்தான் விசிக 2 தொகுதிகளில் வெற்றி பெற்றது என்றும் அவர் குறிப்பிட்டார். விஜய்க்கு கிடைத்த வாக்குகள் ஒரே வகையானவை அல்ல. அவற்றை வேறு கூட்டணிக்கு மாற்ற முடியுமா என்பதே கேள்வி. அவற்றில் சுமார் 20 சதவீதம் ராகுல் காந்தி, திமுக, விசிக, மார்க்சிஸ்ட் கம்யூனிஸ்ட், இந்திய கம்யூனிஸ்ட், முஸ்லிம் லீக் ஆகிய கட்சிகளின் வாக்கு வங்கிகளிலிருந்தும், 11 சதவீதம் மோடி, அண்ணாமலை சார்ந்த இந்து வாக்குகளிலிருந்தும், 4 சதவீதம் சீமான் ஆதரவாளர்களிடமிருந்தும் வந்திருக்கலாம் என்பது தனது கணிப்பு என ரவீந்திரன் துரைசாமி கூறினார். திருமாவளவனுக்கும் ராகுல் காந்திக்கும் நெருக்கமான உறவு இருப்பதால், 2029-ல் ஸ்டாலினுடன் கூட்டணியா, விஜய்யுடன் கூட்டணியா என சிலர் யோசிக்கலாம் என்றார். திமுக கூட்டணி கட்சிகள் உடனடியாக இறுதி முடிவு எடுக்க வேண்டிய அவசியமில்லை; அடுத்தகட்ட அரசியல் சூழலைப் பார்த்தே முடிவு செய்வார்கள் என்றும் அவர் தெரிவித்தார்.