ஐதராபாத், அக். 14-
வெஸ்ட் இண்டீசுக்கு எதிரான 20 ஓவர் கிரிக்கெட் தொடரை கைப்பற்றும் முனைப்புடன் இந்திய அணி இன்று 4-வது ஆட்டத்தில் களம் காண்கிறது. ஐந்து போட்டிகள் கொண்ட தொடரில் இந்தியா 2-1 என்ற கணக்கில் முன்னிலை வகிக்கிறது. இரு அணிகளுக்கு இடையிலான 4-வது 20 ஓவர் போட்டி ஐதராபாத்தில் உள்ள ராஜீவ்காந்தி ஸ்டேடியத்தில் இன்று இரவு 7 மணிக்கு நடைபெறுகிறது. முதல் மற்றும் 3-வது ஆட்டங்களில் இந்தியாவும், 2-வது ஆட்டத்தில் வெஸ்ட் இண்டீசும் வெற்றி பெற்றன. இன்றைய போட்டியில் வெற்றி பெற்றால் இந்திய அணி தொடரை கைப்பற்றும். இதனால் இந்திய வீரர்கள் தீவிரமாக தயாராகி வருகின்றனர். இந்திய அணியில் சஞ்சு சாம்சன், அபிஷேக் ஷர்மா, கேப்டன் ஸ்ரேயாஸ் அய்யர், இஷான் கிஷன் ஆகியோர் நல்ல பார்மில் உள்ளனர். ராஞ்சியில் நடைபெற்ற 2-வது ஆட்டத்தில் இந்தியா 249 ரன்கள் குவித்தபோதிலும், பந்து வீச்சில் சொதப்பியதால் தோல்வியை சந்தித்தது. 3-வது ஆட்டத்தில் இந்திய பந்து வீச்சாளர்கள் சிறப்பாக செயல்பட்டனர். குறிப்பாக அர்ஷ்தீப்சிங் 3 விக்கெட்டுகளை வீழ்த்தி அணியின் வெற்றியில் முக்கிய பங்கு வகித்தார். அதே உத்வேகத்துடன் இன்றைய ஆட்டத்திலும் வெற்றி பெற்று தொடரை கைப்பற்ற இந்திய வீரர்கள் முனைப்புடன் உள்ளனர். 20 ஓவர் கிரிக்கெட்டில் அபாயகரமான அணிகளில் ஒன்றான வெஸ்ட் இண்டீஸ் அணியில் அதிரடி ஆட்டக்காரர்களுக்கு பஞ்சமில்லை. கேப்டன் ஷாய் ஹோப், ரூதர்போர்டு, ரொமன் பவெல், ஹெட்மயர் ஆகியோர் இந்திய பந்து வீச்சாளர்களுக்கு சவால் அளிக்கக்கூடியவர்கள். தொடரை வெல்லும் வாய்ப்பில் நீடிக்க இன்றைய ஆட்டத்தில் வெற்றி பெற வேண்டிய கட்டாயத்தில் இருப்பதால், அந்த அணி கடும் போராட்டம் அளிக்கும் என எதிர்பார்க்கப்படுகிறது. ஐதராபாத் ஆடுகளம் பேட்டிங்குக்கு சாதகமானதாகும். 2024-ம் ஆண்டில் இந்திய அணி இங்கு வங்காளதேசத்துக்கு எதிராக 297 ரன்கள் குவித்தது குறிப்பிடத்தக்கது. இதனால் இன்றைய போட்டியிலும் ரசிகர்களுக்கு ரன் விருந்து காத்திருக்கிறது. இந்திய அணியின் உத்தேச வீரர்கள்: அபிஷேக் ஷர்மா, சஞ்சு சாம்சன், இஷான் கிஷன், ஸ்ரேயாஸ் அய்யர் (கேப்டன்), திலக் வர்மா, நமன் திர், நிதிஷ்குமார் ரெட்டி, அக்ஷர் பட்டேல், பிரின்ஸ் யாதவ், மயங்க் யாதவ், அர்ஷ்தீப்சிங்.வெஸ்ட் இண்டீஸ் அணியின் உத்தேச வீரர்கள்: ஷாய் ஹோப் (கேப்டன்), கமில் பூரன், ஹெட்மயர், ரொமன் பவெல், ரூதர்போர்டு, ரொமாரியோ ஷெப்பர்டு அல்லது குயின் டின் சாம்ப்சன், ரோஸ்டன் சேஸ், ஷமார் ஸ்பிரிங்கர், கீமோ பால், ஷமார் ஜோசப், குடகேஷ் மோட்டி.
