பாட்னா: செப். 21:
பிஹாரில் தொடர் கனமழையால் ஏற்பட்டுள்ள வெள்ளத்தில் சுமார் 50 லட்சம் பேர் பாதிக்கப்பட்டுள்ளதாக தெரிவிக்கப்பட்டுள்ளது. கங்கை உள்ளிட்ட முக்கிய நதிகளில் வெள்ளம் கரைபுரண்டு ஓடுவதால், தலைநகர் பாட்னா உள்பட 15 மாவட்டங்கள் வெள்ளத்தில் தத்தளித்து வருகின்றன.
இந்த நிலையில், ராஷ்ட்ரீய ஜனதாதளத்தின் தேசிய செயல் தலைவரும், பிஹார் சட்டப்பேரவை எதிர்க்கட்சித் தலைவருமான தேஜஸ்வி யாதவ், பாட்னாவில் வெள்ளம் பாதித்த பகுதிகளை ஆய்வு செய்தார். பின்னர் செய்தியாளர்களிடம் அவர் கூறியதாவது:
“வெள்ளத்தில் மக்கள் உயிரிழந்து வருகின்றனர். இருந்தபோதிலும், உணர்வற்ற அரசு மக்களின் துயரத்தின் மீது அக்கறையின்றி உள்ளது. இந்த வெள்ளப்பெருக்கை உடனடியாக தேசிய பேரிடராக அறிவிக்க வேண்டும். மேலும், வெள்ளத்தால் பாதிக்கப்பட்ட ஒவ்வொரு குடும்பத்துக்கும் மாநில அரசு தலா ரூ.15 ஆயிரம் வழங்க வேண்டும்” என்றார்.
பிஹாரில் கடந்த சில நாட்களாக பெய்து வரும் தொடர் கனமழையால் பல்வேறு பகுதிகளில் வெள்ளப்பெருக்கு ஏற்பட்டுள்ளது. இதன் காரணமாக மக்கள் கடுமையாக பாதிக்கப்பட்டுள்ளதாக தேஜஸ்வி யாதவ் தெரிவித்தார். பாதிக்கப்பட்ட குடும்பங்களுக்கு மாநில அரசு உடனடியாக நிதியுதவி வழங்க வேண்டும் என்றும் அவர் வலியுறுத்தினார்.
இதற்கிடையே, பிஹாரில் வெள்ளப் பாதிப்புகளை கடந்த சில நாட்களுக்கு முன்பு ஆய்வு செய்த மத்திய வேளாண் அமைச்சர் சிவராஜ் சிங் சவுஹான், வெள்ளத்தால் பாதிக்கப்பட்ட ஒவ்வொரு குடும்பத்துக்கும் மத்திய அரசு சார்பில் ரூ.7,000 வழங்கப்பட்டுள்ளதாக தெரிவித்திருந்தார். பிஹாரில் வெள்ளப் பாதிப்பு தொடர்ந்து தீவிரமடைந்து வரும் நிலையில், பாதிக்கப்பட்ட மக்களுக்கு நிவாரண உதவிகளை அதிகரிக்க வேண்டும் என்ற கோரிக்கை எழுந்துள்ளது.
