டான்காஸ்டர், அக். 11-
இங்கிலாந்தின் டான்காஸ்டர் அருகே உள்ள யார்க்ஷயர் வனவிலங்கு பூங்காவில் புலிகள் அடைப்புக்குள் நுழைந்த ஒருவர், புலி தாக்கியதில் உயிரிழந்தார். இதையடுத்து பூங்கா முழுவதும் காலி செய்யப்பட்டது. புலி காயமின்றி இருப்பதாகவும், பொதுமக்களுக்கு எந்தவிதமான பரவலான ஆபத்தும் இல்லை என்றும் போலீஸார் தெரிவித்தனர்.
சனிக்கிழமை பிற்பகல் 1.35 மணியளவில், ஒருவர் புலிகள் அடைப்புக்குள் நுழைந்ததாக தகவல் கிடைத்ததாக தெற்கு யார்க்ஷயர் போலீஸார் தெரிவித்தனர். புலி தாக்கியதில் அந்த நபருக்கு பலத்த காயங்கள் ஏற்பட்டன. மருத்துவப் பணியாளர்கள் மேற்கொண்ட முயற்சிகளையும் மீறி, சம்பவ இடத்திலேயே அவர் உயிரிழந்ததாக போலீஸார் அறிக்கையில் கூறினர். உயிரிழந்தவரின் அடையாளம் இதுவரை வெளியிடப்படவில்லை. அவரது குடும்பத்தினருக்கு தகவல் தெரிவிக்கப்பட்டுள்ளதாகவும், சிறப்பு அதிகாரிகள் அவர்களுக்கு ஆதரவு வழங்கி வருவதாகவும் போலீஸார் தெரிவித்தனர். “இந்த துயரமான நேரத்தில் அவர்களின் குடும்பத்தினருடன் எங்களது எண்ணங்கள் உள்ளன” என்றும் போலீஸார் கூறினர். புலியின் நிலை குறித்து பரவிய வதந்திகளுக்கு பதிலளித்த போலீஸார், புலி காயமின்றி இருப்பதாகவும், சம்பவத்துக்குப் பிறகும் அது அடைப்புக்குள்ளேயே இருந்ததாகவும் தெரிவித்தனர். பொதுமக்களுக்கு பரவலான ஆபத்து எதுவும் இல்லை என்றும் அவர்கள் கூறினர்.சம்பவம் தொடர்பான காணொலிகள் இணையத்தில் பரவி வருவதாகத் தெரிவித்த போலீஸார்,
அந்த துயரமான காட்சிகளைப் பகிர வேண்டாம் என பொதுமக்களைக் கேட்டுக்கொண்டனர். சம்பவத்தைத் தொடர்ந்து யார்க்ஷயர் வனவிலங்கு பூங்கா காலி செய்யப்பட்டது. ஞாயிற்றுக்கிழமை வரை பூங்கா மூடப்பட்டிருக்கும் என நிர்வாகம் அறிவித்துள்ளது. அவசரநிலை நடவடிக்கைகள் உடனடியாக செயல்படுத்தப்பட்டதாகவும், அவசர சேவைப் பிரிவினர் சம்பவ இடத்துக்கு வந்ததாகவும் பூங்கா தெரிவித்தது. சம்பவம் எவ்வாறு நிகழ்ந்தது என்பதை அதிகாரிகளுடன் இணைந்து கண்டறிந்து வருவதாகவும், பார்வையாளர்கள், பணியாளர்கள் மற்றும் விலங்குகளின் பாதுகாப்பே தங்களது முதன்மை முன்னுரிமை என்றும் நிர்வாகம் கூறியது. சம்பவத்துக்கு வழிவகுத்த சூழ்நிலைகள் அதிகாரப்பூர்வமாக இன்னும் உறுதி செய்யப்படவில்லை.
