சென்னை: நவ. 4-
அ.தி.மு.க. எம்.எல்.ஏ.க்கள் ராஜினாமா செய்ததால் காலியான 5 சட்டமன்றத் தொகுதிகளில் இடைத்தேர்தல் நடத்த தேர்தல் கமிஷன் தயாராகி வருகிறது. இந்தத் தொகுதிகள் தொடர்பான வழக்கில் சென்னை ஐகோர்ட்டு தீர்ப்பை ஒத்திவைத்துள்ளது. தீர்ப்பு விரைவில் வெளியாகும் என எதிர்பார்க்கப்படும் நிலையில், தேர்தல் பணிகள் தீவிரப்படுத்தப்பட்டுள்ளன.
தமிழக சட்டமன்றத் தேர்தலில் வெற்றி பெற்று தவெக ஆட்சி அமைத்தது. ஆனால் ஆட்சிக்கு போதிய எம்.எல்.ஏ.க்கள் இல்லாத நிலையில், அ.தி.மு.க.வில் இருந்து வெற்றி பெற்ற 25 எம்.எல்.ஏ.க்கள், கட்சி தலைமையின் உத்தரவையும் மீறி தவெக ஆட்சிக்கு ஆதரவு அளித்தனர். இதனால் அ.தி.மு.க.வில் குழப்பம் ஏற்பட்டது. அக்கட்சியைச் சேர்ந்த சில எம்.எல்.ஏ.க்கள் ராஜினாமா செய்து தவெக.வில் இணைந்ததால் 7 தொகுதிகள் காலியாகின.
இதில் மதுராந்தகம், தாராபுரம் ஆகிய 2 தொகுதிகளுக்கு சமீபத்தில் இடைத்தேர்தல் நடைபெற்றது. அ.தி.மு.க. சார்பில் போட்டியிட்டு வெற்றி பெற்றிருந்த மரகதம் குமரவேலும், சத்தியபாமாவும் முறையே மதுராந்தகம், தாராபுரம் தொகுதிகளில் தவெக. சார்பில் போட்டியிட்டு மீண்டும் வெற்றி பெற்றனர். மீதமுள்ள புதுக்கோட்டை மாவட்டம் விராலிமலை, கரூர், நெல்லை மாவட்டம் அம்பாசமுத்திரம், ஈரோடு மாவட்டம் பெருந்துறை மற்றும் முதல்-அமைச்சர் விஜய் ராஜினாமா செய்த திருச்சி கிழக்கு ஆகிய 5 தொகுதிகளிலேயே இடைத்தேர்தல் நடத்தப்பட உள்ளது. தற்போது வாக்காளர் பட்டியல் சுருக்கமுறை திருத்தப் பணிகள் நடைபெற்று வருகின்றன. இப்பணிகள் டிசம்பர் மாதம் முடிவடைந்து, ஜனவரி முதல் வாரத்தில் இறுதி வாக்காளர் பட்டியல் வெளியிடப்பட உள்ளது. இடைத்தேர்தல் அறிவிக்கப்பட்டால் இதில் சில மாற்றங்கள் ஏற்படலாம் என கூறப்படுகிறது. வாக்குச்சாவடிகளுக்கான புதிய பட்டியலை தேர்தல் கமிஷன் வெளியிட்டுள்ளது. அதில் 56 வாக்குச்சாவடிகள் புதிதாக சேர்க்கப்பட்டுள்ளன. வாக்குப்பதிவு எந்திரங்களை தயார் செய்வது உள்ளிட்ட பணிகள் குறித்து மாவட்ட தேர்தல் அதிகாரிகளுடன் ஆலோசனையும் நடைபெற்று வருகிறது. அனைத்து அரசியல் கட்சிகளும் தேர்தலுக்கு தயாராகி வருகின்றன. திருச்சி கிழக்கு தொகுதி தவிர, விராலிமலையில் சி.விஜயபாஸ்கர், கரூரில் எம்.ஆர்.விஜயபாஸ்கர், அம்பாசமுத்திரத்தில் இசக்கி சுப்பையா, பெருந்துறையில் ஜெயக்குமார் ஆகியோருக்கு மீண்டும் வாய்ப்பு கிடைக்கும் என கூறப்படுகிறது. இவர்களை எதிர்த்து போட்டியிடுவோர் குறித்த பேச்சுகள் தீவிரமடைந்துள்ளதால் தமிழக அரசியல் களம் சூடுபிடித்துள்ளது.
