புதுடெல்லி, அக். 13-
டெல்லியில் கடந்த சில நாட்களாக நடைபெற்று வரும் போராட்டங்களால், தலைநகர் முழுவதும் சுமார் ரூ.2,000 கோடி அளவுக்கு வர்த்தக இழப்பு ஏற்பட்டுள்ளதாக வர்த்தகர்கள் தெரிவித்துள்ளனர்.
இதுதொடர்பாக, டெல்லியில் உள்ள வர்த்தகம் மற்றும் தொழில்துறை கூட்டமைப்பின் தலைவர் பிரிஜேஷ் கோயல், காவல் ஆணையருக்கு கடிதம் எழுதியுள்ளார். அதில், தலைமைத் தேர்தல் ஆணையர் ஞானேஷ் குமார் பதவி விலகக்கோரி டெல்லியில் கடந்த சில நாட்களாக போராட்டங்கள் நடைபெற்று வருவதாகக் குறிப்பிட்டுள்ளார்.
கடந்த 10-ம் தேதி நடைபெற்ற போராட்டத்தின்போது, டெல்லியின் பல்வேறு பகுதிகளில் உள்ள கடைகளை மூடுமாறு உள்ளூர் அதிகாரிகள் தெரிவித்ததாக அவர் கூறியுள்ளார். சில இடங்களில் போலீஸாரும் நிர்வாகத்தினரும் வர்த்தகர்களுக்கு அழுத்தம் கொடுத்ததாகவும் கடிதத்தில் தெரிவிக்கப்பட்டுள்ளது.
இதன் காரணமாக, பல்வேறு பகுதிகளில் வர்த்தகம் முற்றிலும் முடங்கியதாகவும், டெல்லி முழுவதும் சுமார் ரூ.2,000 கோடி அளவுக்கு வர்த்தக இழப்பு ஏற்பட்டதாகவும் பிரிஜேஷ் கோயல் குறிப்பிட்டுள்ளார். போராட்டங்கள் நடைபெறும் நேரங்களில் கடைகளை மூடுமாறு வர்த்தகர்களைக் கட்டாயப்படுத்தக் கூடாது என அவர் வலியுறுத்தியுள்ளார்.
மேலும், சந்தைகள் தொடர்ந்து செயல்படுவதற்குத் தேவையான பாதுகாப்பு ஏற்பாடுகளைச் செய்ய வேண்டும் என்றும் காவல் ஆணையரிடம் கோரிக்கை விடுத்துள்ளார். தற்போது நவராத்திரி மற்றும் ராம்லீலா நிகழ்ச்சிகள் நடைபெற்று வருவதாகவும், தீபாவளி பண்டிகையும் நெருங்கி வருவதாகவும் அவர் தெரிவித்துள்ளார். இந்தச் சூழலில் சந்தைகளுக்கு வாடிக்கையாளர்களின் வருகை அதிகரிக்கும் என்றும், கடையடைப்பு அல்லது பிற இடையூறுகள் ஏற்பட்டால் விற்பனை பாதிக்கப்படும் என்றும் கடிதத்தில் குறிப்பிடப்பட்டுள்ளது. எனவே, மீண்டும் இதுபோன்ற இடையூறுகள் ஏற்படாத வகையில் நடவடிக்கை எடுக்க வேண்டும் என பிரிஜேஷ் கோயல் வலியுறுத்தியுள்ளார்.
