ஜந்தர் மந்தரில் நுழைந்தவர்கள் கைது

புதுடெல்லி, அக். 13-
புதுடெல்லி ஜந்தர் மந்தர் பகுதியில் போராட்டம் நடத்தத் தடை விதிக்கப்பட்டிருந்த நிலையில், அதனை மீறி உள்ளே நுழைந்து போராட்டத்தில் ஈடுபட்ட சிஜேபி அதாவது கரப்பான் பூச்சி கட்சியின் முக்கியத் தலைவர்கள் சௌரவ் தாஸ் மற்றும் அசுதோஷ் ரங்கா உள்ளிட்டோரை காவல்துறையினர் அதிரடியாகக் கைது செய்தனர்.
ஜந்தர் மந்தர் இனி அதிகாரப்பூர்வமான போராட்டக் களம் அல்ல என்று தில்லி அரசு நேற்று முன்தினம் அதிரடி அறிவிப்பு ஒன்றை வெளியிட்டிருந்தது. இந்த உத்தரவை வன்மையாகக் கண்டித்துள்ள சிஜேபி கட்சியினர், எங்களை எங்கு தடுத்தாலும் ஜந்தர் மந்தரில் போராட்டம் நடத்தியே தீருவோம் என்று கூறி இன்று காலை திடீர் போராட்டத்தில் குதித்தனர்.
தில்லி அரசு தடை விதித்ததைத் தொடர்ந்து, ஜந்தர் மந்தர் பகுதியைச் சுற்றி நூற்றுக்கணக்கான காவல்துறையினர் குவிக்கப்பட்டு அணைப் பாதுகாப்பு போடப்பட்டிருந்தது. எப்பேர்ப்பட்ட பாதுகாப்பையும் மீறிவிட வேண்டும் என்ற ஆவேசத்துடன் வந்த சிஜேபி தொண்டர்கள், அங்குள்ள ஜெடியு கட்சி அலுவலகத்தின் நுழைவாயில் வழியாகத் தாவிக்குதித்து ஜந்தர் மந்தருக்குள் அதிரடியாக நுழைந்தனர். கைகளில் தேசியக் கொடியான மூவர்ணக் கொடியை பிடித்தவாறு அவர்கள் மத்திய அரசுக்கு எதிராகக் கோஷங்களை எழுப்பத் தொடங்கினர்.
“பாரத் மாதா கி ஜை” என்றும், “ஞானேஷ் குமார் உடனடியாகப் பதவி விலக வேண்டும்” என்றும் முழக்கங்கள் விண்ணைப் பிளந்தன. இதைக் கண்டதும் உஷாரான பாதுகாப்புப் படையினர், உடனடியாகச் செயல்பட்டுப் போராட்டக்காரர்களைக் கட்டாயப்படுத்தி அப்புறப்படுத்த முயன்றனர். இதனால் போலீசாருக்கும் சிஜேபி தொண்டர்களுக்கும் இடையே கடுமையான வாக்குவாதமும், தள்ளுமுள்ளும், கடுமையான உந்தல்களும் ஏற்பட்டு அந்தப் பகுதியே போர்க்களமானது.
சமரசத்திற்கு இடமளிக்காமல் விடாப்பிடியாகப் போராடிய சௌரவ் தாஸ், அசுதோஷ் ரங்கா மற்றும் மற்ற போராட்டக்காரர்களை போலீசார் பலவந்தமாகத் தூக்கிச் சென்று வண்டியில் ஏற்றி அங்கிருந்து அப்புறப்படுத்தினர்.
இதற்கிடையே, தங்களது தலைவர்கள் கைது செய்யப்பட்டதை உறுதிப்படுத்தும் வீடியோ ஒன்றை சிஜேபி அமைப்பின் நிறுவனரான அபிஜீத் திப்தே சமூக வலைத்தளங்களில் வெளியிட்டுள்ளார். தேசியக் கொடியை ஏந்திய வண்ணம் அதிகாலையிலேயே ஜந்தர் மந்தருக்குள் நுழைந்த எங்களது தொண்டர்களைப் போலீசார் இழுத்துச் சென்றுள்ளனர் என்று அவர் அதில் குறிப்பிட்டுள்ளார். மேலும், ஜனநாயக முறையிலான எங்களது எதிர்ப்புக் குரலை அரசாங்கத்தின் சாதாரண உத்தரவுகள் மூலமாக எக்காலத்திலும் ஒடுக்கிவிட முடியாது என்று அவர் மத்திய அரசுக்குச் சவால் விட்டுள்ளார்.