ஜெருசலேம்: நவ.9
ஈரானுக்கு எதிரான இஸ்ரேலின் ராணுவ நடவடிக்கை இன்னும் முடிவுக்கு வரவில்லை என்று இஸ்ரேல் பாதுகாப்பு அமைச்சர் இஸ்ரேல் காட்ஸ் தெரிவித்துள்ளார். மேலும், இஸ்ரேலுக்கு பெரும் அச்சுறுத்தலை ஏற்படுத்தும் வகையில் ஈரான் மீண்டும் அணுஆயுதம் பெறுவதற்கான முயற்சிகளில் ஈடுபட்டு வருவதாகவும் அவர் குற்றம்சாட்டியுள்ளார்.
1956-ஆம் ஆண்டு நடைபெற்ற சினாய் போரில் உயிரிழந்த இஸ்ரேல் வீரர்களின் நினைவேந்தல் நிகழ்ச்சியில் காட்ஸ் பேசினார். அப்போது அவர், “ஈரானைப் பொறுத்தவரை நமது லட்சியப் பணி இன்னும் நிறைவடையவில்லை. இஸ்ரேல் அரசுக்கு பெரும் அச்சுறுத்தலை ஏற்படுத்தும் வகையில் ஈரான் மீண்டும் அணுஆயுதம் பெறுவதற்கான முயற்சிகளில் ஈடுபட்டு வருகிறது” என்று தெரிவித்தார்.
ஈரான் அணுஆயுதம் தயாரிக்க முயற்சி செய்து வருவதாக இஸ்ரேல் தொடர்ந்து குற்றம்சாட்டி வருகிறது. எனினும், இந்தக் குற்றச்சாட்டை ஈரான் தொடர்ந்து மறுத்து வருகிறது. தனது அணுசக்தித் திட்டங்கள் அனைத்தும் அமைதிப் பயன்பாட்டுக்கானவை மட்டுமே என்று ஈரான் வலியுறுத்தி வருகிறது.
இதற்கிடையே, லெபனானில் செயல்பட்டு வரும் ஈரான் ஆதரவு பெற்ற ஹிஸ்புல்லா அமைப்புக்கும் காட்ஸ் எச்சரிக்கை விடுத்துள்ளார். ஈரானுடன் இணைந்து இஸ்ரேல் மீது மீண்டும் தாக்குதல் நடத்த ஹிஸ்புல்லா முயன்றால், அந்த அமைப்பு கடுமையான விளைவுகளைச் சந்திக்க நேரிடும் என்று அவர் தெரிவித்துள்ளார்.
மேலும், காசா, லெபனான் மற்றும் சிரியாவில் உள்ள பாதுகாப்புப் பகுதிகளில் இருந்து இஸ்ரேல் படைகள் வாபஸ் பெறப்படாது என்றும் காட்ஸ் திட்டவட்டமாக அறிவித்துள்ளார்.
இஸ்ரேலில் கடந்த அக்டோபர் 27-ஆம் தேதி நடைபெற்ற பொதுத்தேர்தலில் பிரதமர் பெஞ்சமின் நெதன்யாகுவின் கூட்டணி பெரும்பான்மையை இழந்தது. இதையடுத்து, புதிய ஆட்சி அமைக்க எதிர்க்கட்சித் தலைவர் காடி ஐசன்கோட்டுக்கு அதிபர் அழைப்பு விடுத்துள்ளார். இந்தச் சூழலில், நெதன்யாகு தனது சுய அரசியல் தேவைகளுக்காக ராணுவத்தைப் போரில் ஈடுபடுத்தக் கூடாது என்று ஐசன்கோட் எச்சரித்துள்ளார்.
