டெஹ்ரான், செப்.20- மேற்கு ஆசியாவில் அமெரிக்காவிற்கும் ஈரானுக்கும் இடையே மோதல் உச்சக்கட்டத்தை எட்டியுள்ள நிலையில், போரை முடிவுக்குக் கொண்டுவந்து அமெரிக்காவுடன் மீண்டும் பேச்சுவார்த்தையைத் தொடங்க ஈரான் 7 நிபந்தனைகளை விதித்துள்ளதாகத் தகவல்கள் வெளியாகியுள்ளன. ஈரான் தன் செய்தியை கத்தார் நாட்டின் மூலமாக அமெரிக்காவிற்கு அனுப்பியுள்ளது.ஈரானின் உச்ச தேசிய பாதுகாப்பு கவுன்சில் செயலாளர் மொஹ்சென் ரெஜாய் இந்த விவரத்தை வெளியிட்டுள்ளார். டெஹ்ரானின் நிலைப்பாடு மிகத் தெளிவாகவும், குழப்பமில்லாமலும் உள்ளது என்று கூறியுள்ள அவர், தூதரக அளவிலான பேச்சுவார்த்தைக்கு அமெரிக்கா முன்வர வேண்டுமானால், ஈரானின் உரிமைகளையும் நிபந்தனைகளையும் ஏற்றுக்கொள்ள வேண்டும் என்று வலியுறுத்தியுள்ளார். இதுகுறித்து சமூக வலைதளத்தில் பதிவிட்டுள்ள ரெஜாய், அமெரிக்கா தான் உருவாக்கிய மோதலிலிருந்து வெளியேறவும், மேலும் சிக்கலில் மாட்டிக்கொள்வதைத் தவிர்க்கவும் ஈரானின் உரிமைகளையும் நிபந்தனைகளையும் ஒப்புக்கொள்வது அவசியமாகும் என்று கூறியுள்ளார். அமெரிக்க அதிபர் டொனால்ட் டிரம்ப்பின் மிரட்டல்களால் எந்தப் பயனும் இல்லை என்றும், ஈரான் தீர்க்கமான போருக்கும் தயார் நிலையில் உள்ளது என்றும் எச்சரித்துள்ளார். ஈரான் விதித்துள்ள 7 நிபந்தனைகளின் முழுமையான அதிகாரப்பூர்வ பட்டியலை ரெஜாய் வெளிப்படுத்தவில்லை என்றாலும், 3 முக்கிய கோரிக்கைகளைத் தெளிவாகக் குறிப்பிட்டுள்ளார்:
* அனைத்து முனைகளிலும் போருக்கு முற்றுப்புள்ளி வைப்பது
* வெளிநாடுகளில் முடக்கி வைக்கப்பட்டுள்ள ஈரானின் நிதிய சொத்துக்களை விடுவிப்பது
* அமெரிக்கா விதித்துள்ள கடற்படை தடைகளை நீக்குவது
எஞ்சிய நிபந்தனைகளில் பொருளாதாரத் தடைகளைத் தளர்த்துவது, கடல் வழிகளின் பாதுகாப்பு மற்றும் பிராந்திய அளவில் ராணுவ பதற்றத்தைக் குறைக்கும் நடவடிக்கைகள் அடங்கியிருக்கலாம் என சில தகவல்கள் தெரிவிக்கின்றன. ஆனால் இவற்றை ஈரான் அதிகாரப்பூர்வமாக முழுமையாக வெளியிடவில்லை. மீண்டும் அமெரிக்கா தாக்குதல் நடத்த வாய்ப்பு?
அமெரிக்கா மீண்டும் ஒரு தாக்குதலை நடத்தக்கூடிய சாத்தியக்கூறைத் தள்ளிவிட முடியாது என்று ரெஜாய் தெரிவித்துள்ளார். ஈரானின் ராணுவ மதிப்பீட்டின்படி இதுபோன்ற தாக்குதலுக்கான வாய்ப்பு இன்னும் உள்ளது. இருப்பினும், எந்தவொரு சூழ்நிலையையும் எதிர்கொள்ள ஈரான் தயாராக உள்ளது என்று அவர் குறிப்பிட்டுள்ளார்.வளைகுடா பகுதியிலிருந்து ஓமன் வளைகுடா மற்றும் அரபிக்கடல் வரை பரவியுள்ள அமெரிக்க கடற்படையின் நகர்வுகளைக் கண்காணிப்பதில்தான் ஈரானின் தற்போதைய ராணுவத் திட்டங்கள் கவனம் செலுத்தி வருகின்றன என்று ரெஜாய் கூறினார். அமெரிக்க போர்க்கப்பல் அல்லது விமானம் தாங்கி கப்பலின் அருகே ஈரான் பல வெடிமருந்துகளைச் சுமந்து செல்லும் ஏவுகணைச் சோதனையை நடத்தியுள்ளதாகவும் அவர் உரிமை கோரியுள்ளார்.
எதிர்காலத்தில் அமெரிக்கா தாக்குதல் நடத்தினால், ஈரானின் பதிலடி மிகவும் தீவிரமாக இருக்கும். அந்தச் சூழ்நிலையில் மேற்கு ஆசியாவில் உள்ள அமெரிக்க ராணுவ முகாம்கள் மட்டுமின்றி, இந்த மண்டலத்தில் இயங்கி வரும் அமெரிக்க வணிக நலன்கள் மற்றும் நிறுவனங்களும் இலக்காகும் என எச்சரித்துள்ளார்.
அணுசக்தி ஒப்பந்தத்தில் இருந்து விலகும் எண்ணம் இல்லை
ஈரானின் அணுசக்தி திட்டம் குறித்தும் ரெஜாய் தெளிவுபடுத்தியுள்ளார். தற்போதைக்கு அணுசக்தி பரவல் தடை ஒப்பந்தத்தில் (NPT) இருந்து விலகும் முடிவை ஈரான் எடுக்கவில்லை என்று அவர் கூறியுள்ளார். ஆனால் அமெரிக்காவின் நடவடிக்கைகள் ஈரானை அத்தகைய முடிவை நோக்கித் தள்ளக்கூடும் என்றும் எச்சரித்துள்ளார். ஈரானின் அணுசக்திக் கொள்கையில் எந்த மாற்றமும் இல்லை; அணு ஆயுதப் பயன்பாட்டைத் தடை செய்யும் மத ரீதியிலான கட்டளையை ஈரான் தொடர்ந்து பின்பற்றி வருகிறது என்றும் அவர் கூறியுள்ளார்.
ஹார்முஸ், பாப் அல்-மந்தப் குறித்த விளக்கம்
ஈரான் ‘பாப் அல்-மந்தப்’ நீரிணையை மூடுவதற்கு வாய்ப்புள்ளதாக எழுந்த வதந்தியை ரெஜாய் மறுத்துள்ளார். இது ஏமன் தொடர்பானது என்றும், ஹவுதி இயக்கத்துடன் தொடர்புடையது என்றும் அவர் விளக்கமளித்தார்.
அதேவேளையில், ‘ஹார்முஸ்’ நீரிணை தொடர்பாக ஈரானுக்கும் ஓமனுக்கும் இடையே ஒப்பந்தம் ஒன்றை அறிவிக்கும் அளவுக்குப் பேச்சுவார்த்தை நடந்ததாகவும், ஆனால் பின்னர் அந்த நடைமுறை நிறுத்தப்பட்டதாகவும் கூறினார். தேவைப்பட்டால் பிராந்திய நாடுகளின் ஒப்புதலுடன் அந்தத் திட்டத்தை மீண்டும் முன்னெடுத்துச் செல்லலாம் எனத் தெரிவித்தார்.
பேச்சுவார்த்தைக்கு மத்தியஸ்தம்
டெஹ்ரானுக்கும் வாஷிங்டனுக்கும் இடையிலான பேச்சுவார்த்தையை மீண்டும் தொடங்குவதற்கு கத்தார் மற்றும் பாகிஸ்தான் முயற்சி செய்து வருவதாகத் தெரிகிறது. கடந்த மாதம் புரிந்துணர்வு ஒப்பந்தத்தின் காலம் முடிந்த நிலையில் இந்த முயற்சிகள் மேற்கொள்ளப்பட்டு வருகின்றன.
கடந்த பிப்ரவரி மாத இறுதியில் அமெரிக்காவும் இஸ்ரேலும் ஈரான் மீது தாக்குதல் நடத்திய பிறகு தொடங்கிய இந்த மோதலை முடிவுக்குக் கொண்டுவர, அப்பகுதியில் உள்ள பல நாடுகள் தூதரக ரீதியிலான முயற்சிகளை மேற்கொண்டு வருகின்றன. பாகிஸ்தானும் மத்தியஸ்த முயற்சிகளைத் தொடர்ந்து வருகிறது; அங்குள்ள உள்துறை அமைச்சர் மொஹ்சென் நக்வி ஈரான் செல்வார் என எதிர்பார்க்கப்படுகிறது.
போர் இன்னும் நடைமுறையில் தொடர்ந்துகொண்டுதான் இருக்கிறது என்று கூறிய ரெஜாய், ஆனால் இந்த மோதலை முடிந்தவரை விரைவில் முடிவுக்குக் கொண்டுவரும் உத்தியுடன் ஈரான் செயல்பட்டு வருகிறது என்றும் தெளிவுபடுத்தியுள்ளார்.
