சென்னை: அக். 19-
சென்னை ராயபுரத்தில் நேற்றிரவு திடீரென ஏற்பட்ட அறிவிக்கப்படாத மின்வெட்டைக் கண்டித்து, அப்பகுதி மக்கள் சாலை மறியல் போராட்டத்தில் ஈடுபட்டனர். சம்பவ இடத்துக்கு வந்த அ.தி.மு.க. முன்னாள் அமைச்சர் ஜெயகுமார், மின்சாரத்துறை அதிகாரிகளிடம் தொலைபேசியில் பேசி, விரைந்து நடவடிக்கை எடுக்க வேண்டும் என்று வலியுறுத்தினார்.
தமிழக வெற்றிக் கழகம் ஆட்சிப் பொறுப்பேற்றதிலிருந்து மின்வெட்டு மிகப்பெரிய பிரச்சினையாக உருவெடுத்துள்ளதாகவும், குறிப்பாக சென்னையில் அடிக்கடி மின்வெட்டு ஏற்படுவதாகவும் புகார்கள் எழுந்துள்ளன. அந்த வகையில், ராயபுரத்தில் நேற்றிரவு திடீரென மின்சாரம் துண்டிக்கப்பட்டது. அன்றைய தினம் சென்னையில் மழையும் பெய்யவில்லை.
மின்வெட்டால் வயதானவர்கள், நோயாளிகள், பச்சிளம் குழந்தைகள் மற்றும் கர்ப்பிணிகள் கடுமையாக பாதிக்கப்பட்டதாக கூறப்படுகிறது. இவ்வாறு அறிவிக்கப்படாத மின்வெட்டு ஏற்படுவது இது முதல்முறை அல்ல எனக் கூறி, முனிராம் பாண்டியன் மற்றும் அதைச் சுற்றியுள்ள பகுதிகளைச் சேர்ந்த மக்கள் சாலை மறியலில் ஈடுபட்டனர். இதனால் அப்பகுதியில் பரபரப்பு ஏற்பட்டது.
மின்சாரப் பற்றாக்குறை மின்வெட்டுக்கான முக்கியக் காரணமாக இருந்தாலும், மின்சாரத்துறையை முறையாகச் சீரமைக்காததும் முக்கியக் காரணம் எனக் கூறப்படுகிறது. பருவமழைக்கு முன்பாக மின்கம்பிகளைச் சீரமைத்தல், புதிய மின்கம்பங்களை அமைத்தல், மின்கம்பிகளுக்கு குறுக்கே செல்லும் மரக்கிளைகளை அகற்றுதல் உள்ளிட்ட பணிகளை மின்சார வாரியம் மேற்கொள்ளும். இப்பணிகளுக்கு போதிய ஊழியர்கள் தேவைப்படுகிறது.
ஆனால், மின்வாரியத்தில் பணியாளர் பற்றாக்குறை நிலவுவதால், சிறிய பிரச்சினைகளைச் சரிசெய்யவே பல மணி நேரம் ஆகிறது என்று ஊழியர்கள் தெரிவிக்கின்றனர். 40 பேர் பணியாற்ற வேண்டிய இடத்தில் 4 அல்லது 5 பேர் மட்டுமே பணியில் இருப்பதாகவும் அவர்கள் வேதனை தெரிவித்துள்ளனர்.
தமிழக வெற்றிக் கழக ஆட்சி பொறுப்பேற்றபோது மின்சாரத்துறை குறித்து வெள்ளை அறிக்கை வெளியிட்டதாகவும், அதில் கூறப்பட்ட கருத்துகளுக்கும் பின்னர் சட்டப்பேரவையில் துறை அமைச்சர் தெரிவித்த கருத்துகளுக்கும் பெரும் வேறுபாடு இருப்பதாகவும் ஊழியர்கள் கூறுகின்றனர். புதிய பணியாளர்களை நிரந்தர அடிப்படையில் நியமிக்க வேண்டும் என்றும் அவர்கள் வலியுறுத்துகின்றனர்.
