இம்பால்: அக். 19-
மணிப்பூர் மாநிலத்தில் மீண்டும் வன்முறை வெடித்துள்ளது. துப்பாக்கிச் சண்டையில் 3 பேர் படுகாயமடைந்த நிலையில், 2 கிராமங்களுக்கு தீ வைக்கப்பட்டதாகத் தகவல் வெளியாகியுள்ளது.
மணிப்பூரில் பெரும்பான்மையாக உள்ள மைதேயி சமூகத்தினருக்கும் குகி பழங்குடியினருக்கும் இடையே கடந்த 2023-ம் ஆண்டு கலவரம் ஏற்பட்டது. அதன்பிறகு, மாநிலத்தில் இரு தரப்பினருக்கும் இடையே அடிக்கடி மோதல்கள் நிகழ்ந்து வருகின்றன. இந்த வன்முறையில் இதுவரை 300-க்கும் மேற்பட்டோர் உயிரிழந்துள்ளனர்.
இந்த நிலையில், மணிப்பூரின் காம்ஜோங் மாவட்டத்தில் குகி மக்கள் அதிகம் வசிக்கும் சாசாட் கிராமத்துக்குள் நேற்று முன்தினம் மர்ம நபர்கள் புகுந்து துப்பாக்கிச் சூடு நடத்தினர். இந்தத் தாக்குதலில் 36 வயதான ஒருவர் கொல்லப்பட்டார். மேலும் 4 பேர் படுகாயமடைந்தனர்.
இதையடுத்து, அந்தத் தாக்குதலுக்குப் பழிவாங்கும் வகையில், காம்ஜோங் மாவட்டத்தில் டாங்குல் நாகா மக்கள் வசிக்கும் கிராமத்துக்குள் நேற்று மர்ம நபர்கள் புகுந்து துப்பாக்கிச் சூடு நடத்தியதாகக் கூறப்படுகிறது. இதனால் இரு தரப்பினருக்கும் இடையே துப்பாக்கிச் சண்டை ஏற்பட்டது. இதில் டாங்குல் நாகா இனத்தைச் சேர்ந்த 3 பேர் படுகாயமடைந்தனர். பல வீடுகளும் சேதமடைந்தன.
இதற்கிடையில், இந்தியா-மியான்மர் எல்லைக்கு அருகே அமைந்துள்ள ஸ்கிப் மற்றும் பிலோங் ஆகிய 2 டாங்குல் நாகா கிராமங்களுக்கு குகி ஆயுதக் குழுவினர் தீ வைத்ததாகக் கூறப்படுகிறது. இந்தச் சம்பவத்தில் உயிரிழப்பு ஏதும் ஏற்படவில்லை எனத் தெரிவிக்கப்பட்டுள்ளது. ઘટનைகள் தொடர்பாக அப்பகுதியில் பதற்றமான சூழல் நிலவுவதாகக் கூறப்படுகிறது.
