புதுடில்லி, அக். 4- நடப்பு ஆண்டுக்கான லோக்சபா, ராஜ்யசபா எம்.பி.,க்கள் அடங்கிய பார்லிமென்ட் நிலைக்குழுக்கள் மாற்றி அமைக்கப்பட்டுள்ளன. இதில் தி.மு.க. எம்.பி.,க்கள் கனிமொழி, சிவா ஆகியோருக்கு மீண்டும் தலைவர் பதவிகள் வழங்கப்பட்டுள்ளன. மேற்கு வங்க முன்னாள் முதல்வர் மம்தா பானர்ஜி தலைமையிலான திரிணமுல் காங்கிரஸ், இரு முக்கிய நிலைக்குழுக்களின் தலைவர் பதவிகளை இழந்துள்ளது. ஆண்டுதோறும் மாற்றி அமைக்கப்படும் இந்தக் குழுக்கள், அமைச்சகங்களின் பட்ஜெட், கொள்கைகள் மற்றும் சட்டங்களை ஆண்டு முழுவதும் மதிப்பாய்வு செய்கின்றன. ஒவ்வொரு கட்சிக்கும் அதன் எம்.பி.,க்களின் எண்ணிக்கையின் அடிப்படையில் தலைவர் பதவிகள் வழங்கப்படுகின்றன. இந்தப் பதவிகள் ஓராண்டு காலத்துக்கானவை. ராஜ்யசபா தலைவரும், துணை ஜனாதிபதியுமான சி.பி.ராதாகிருஷ்ணன், லோக்சபா சபாநாயகர் ஓம் பிர்லா ஆகியோர் பல்வேறு துறைகளுக்கான நிலைக்குழுக்களை மாற்றி அமைத்து உத்தரவிட்டனர். வெளியுறவு விவகாரங்கள் குழுத் தலைவராக காங்கிரஸ் எம்.பி. சசி தரூர், விவசாயத் துறைக்கான குழுத் தலைவராக சரண்ஜித் சிங் சன்னி ஆகியோர் மீண்டும் நியமிக்கப்பட்டுள்ளனர். தொழில் துறை நிலைக்குழுத் தலைவராக தி.மு.க. எம்.பி. சிவாவும், நுகர்வோர் விவகாரங்கள், உணவு மற்றும் பொது வினியோகக் குழுத் தலைவராக கனிமொழியும் தொடர்கின்றனர். திரிணமுல் காங்கிரஸ் எம்.பி. டோலா சென் வகித்து வந்த வர்த்தகக் குழுத் தலைவர் பதவி, பா.ஜ.க. ராஜ்யசபா எம்.பி. சுதான்ஷு திரிவேதிக்கு வழங்கப்பட்டுள்ளது. கீர்த்தி ஆசாத் வகித்து வந்த ரசாயனம் மற்றும் உரங்கள் குழுத் தலைவர் பொறுப்பு, திரிணமுல் காங்கிரஸ் அதிருப்தியாளர் பிரிவுத் தலைவர் ககோலி கோஷ் தஸ்திதாருக்கு அளிக்கப்பட்டுள்ளது.
