சென்னை, அக். 13- தமிழக முதல்-அமைச்சர் விஜய் பட்டு வேட்டி, சட்டையில் வருவது ஏன் என்பதற்கு அமைச்சர் செங்கோட்டையன் பதில் அளித்துள்ளார். தமிழக சட்டசபைத் தேர்தலில் த.வெ.க. 108 இடங்களைப் பிடித்து, கூட்டணிக் கட்சிகளின் ஆதரவுடன் ஆட்சி அமைத்தது. இதையடுத்து விஜய் முதல்-அமைச்சராகப் பதவியேற்றார். பதவியேற்பு நிகழ்ச்சியில் அவர் கோட்-சூட் அணிந்திருந்தார். தமிழக அரசியல் வழக்கப்படி முதல்-அமைச்சர், அமைச்சர்கள் மற்றும் சட்டசபை உறுப்பினர்கள் பொதுவாக வெள்ளை வேட்டி, சட்டை அணிந்து நிகழ்ச்சிகளில் பங்கேற்பது வழக்கம். எனினும், விஜய் கோட்-சூட் அணிந்தது அரசியல் வட்டாரங்களில் பேசுபொருளானது. பின்னர் அவர் வெள்ளை சட்டைக்கு மாறினார். சில சமயங்களில் பட்டு வேட்டி, சட்டையிலும் அவர் நிகழ்ச்சிகளில் பங்கேற்று வருகிறார். சமீபத்தில் பிரதமர் மோடியைச் சந்தித்தபோது விஜய் அணிந்திருந்த உடை கவனத்தைப் பெற்றது. பிரதமர் மோடியின் சென்னை நிகழ்ச்சிகளில் முழுவதும் விஜய் அடர் கருநீல சட்டை மற்றும் பேண்ட் அணிந்திருந்தார். வழக்கமாக கோட்-சூட்டில் தோன்றும் விஜயின் இந்த உடைத்தேர்வு குறித்து விவாதம் ஏற்பட்டது. இதுதொடர்பாக ஐ.ஐ.டி. நிகழ்ச்சியில் பேசிய த.வெ.க. தொண்டர்கள் சிலர், “எங்கள் தலைவர் தனது உடை மூலமே எதிர்ப்பைப் பதிவு செய்துள்ளார். தனது அரசியல் நிலைப்பாட்டை உணர்த்தும் குறியீடுதான் அது” என்று கூறினர். இந்த நிலையில், செய்தியாளர்கள் எழுப்பிய கேள்விக்கு அமைச்சர் செங்கோட்டையன் பதில் அளித்தார். அவர் கூறுகையில், “முதல்-அமைச்சர் விஜய் வெள்ளிக்கிழமை மட்டுமே பட்டு வேட்டி, சட்டையில் வருவார். மற்ற நாட்களில் அவர் சாதாரணமாகத்தான் வருவார்” என்றார்.
