இந்தியா-மேற்கிந்தியத் தீவுகள் இன்று மோதல்

குவாஹாட்டி, செப். 30-
மேற்கிந்தியத் தீவுகள் கிரிக்கெட் அணி இந்தியாவில் சுற்றுப்பயணம் செய்து விளையாடி வருகிறது. இரு அணிகளுக்கு இடையிலான 3 ஆட்டங்கள் கொண்ட ஒருநாள் தொடரின் முதல் போட்டி திருவனந்தபுரத்தில் நடைபெற்றது. இதில் இந்திய அணி 8 விக்கெட் வித்தியாசத்தில் வெற்றி பெற்றது. இதன் மூலம் தொடரில் இந்திய அணி 1-0 என்ற கணக்கில் முன்னிலை வகிக்கிறது.இந்நிலையில், இரு அணிகளும் மோதும் 2-வது ஒருநாள் போட்டி குவாஹாட்டியில் உள்ள பர்ஸாபரா மைதானத்தில் இன்று பிற்பகல் 2 மணிக்கு நடைபெறவுள்ளது. இந்தப் போட்டியிலும் இந்திய அணி வெற்றி பெற்றால், 2-0 என்ற கணக்கில் தொடரைக் கைப்பற்றும். எனவே, ஒருநாள் தொடரை வெல்லும் முனைப்புடன் ஷுப்மன் கில் தலைமையிலான இந்திய அணி களமிறங்கும் என எதிர்பார்க்கப்படுகிறது. முதல் போட்டியில் இந்திய அணியின் பேட்டிங்கில் ஷுப்மன் கில், விராட் கோலி ஆகியோர் சதம் விளாசினர். இன்றைய ஆட்டத்திலும் அவர்களிடம் இருந்து சிறப்பான மட்டை வீச்சு வெளிப்படும் என எதிர்பார்க்கப்படுகிறது. பந்துவீச்சில் குல்தீப் யாதவ், பிரசித் கிருஷ்ணா, நிதிஷ் ரெட்டி ஆகியோர் உயர்மட்ட செயல்பாட்டை வெளிப்படுத்துவார்கள் என கருதப்படுகிறது. இந்திய அணியின் பேட்டிங் மற்றும் பந்துவீச்சு ஒருங்கிணைந்து செயல்பட்டால், போட்டியில் ஆதிக்கம் செலுத்தும் வாய்ப்பு அந்த அணிக்கு உள்ளது. மறுபுறம், இன்றைய ஆட்டத்தில் தோல்வி அடைந்தால் மேற்கிந்தியத் தீவுகள் அணி தொடரை இழக்க நேரிடும். இதனால் அந்த அணி கூடுதல் கவனத்துடனும், தொடரை தக்கவைத்துக்கொள்ளும் நோக்குடனும் விளையாடக்கூடும். கடந்த போட்டியில் சதம் விளாசிய ஜஸ்டின் கிரீவ்ஸ், அரை சதம் அடித்த ஜாண் கேம்பல், அமிர் ஜாங்கூ ஆகியோர் இந்திய பந்துவீச்சாளர்களுக்கு நெருக்கடி கொடுக்கக்கூடும். தொடரை சமன் செய்ய மேற்கிந்தியத் தீவுகள் அணி வெற்றிக்காக போராடும்.